نوم الطفل الرضيع أو حديثي الولادة على بطنه. مفيد ولا لسة شوية؟ ● طبيبي

نوم الطفل على بطنه مش غلط!

لازم نبقى عارفين إن الاستلقاء على البطن لمدة قصيرة كل يوم ممكن يبقى مفيد جداً لمراحل نمو الطفل. بنسمي الوقت ده Tummy Time. ولإن ماينفعش الطفل ينام على بطنه طول الليل. لازم الأم أو الأب يراقبوا الطفل طول ما هو نايم على بطنه. وده بيبقى لحد سن ٦ شهور. ممكن نخصص ٣-٥ دقائق كذا مرة على مدار اليوم لحد مانوصل لإجمالي ٤٠-٦٠ دقيقة في اليوم. كل ده طبعاً بيعتمد على قدرة الطفل على المحافظة على وضعيته، ده غير احتياجاته الأخرى. بالطريقة دي مش محتاجين نقلق من مسببات ال “SIDS” زي الاختناق. النوم على البطن لمدد قصيرة و بمراقبة الأهل على مرات كتيرة آمن جداً وبيعزز سرعة نمو الأطفال.

ليه لازم الأطفال الرضع يقضوا وقت أطول على بطنهم؟

في أسباب كتير تخلينا نهتم أكتر بالنوم علي البطن عند الأطفال، مع الإشراف عليهم طبعاً. دي بعضها: :

  • النوم على البطن بيمرن عضلات الجزء العلوي من الجسم، وده بيساعد الطفل على التحكم السليم في الرأس واستقرار الجذع.
  • بيساعد الطفل على استخدام وتحريك الذراعين، والرقبة، والظهر، والرأس.
  • بيقوي عضلات الظهر والرجل.
  • بيساعد الطفل على اكتساب المهارات المطلوبة في الزحف، زي محاولة الوصول إلى الأشياء و تحريك الجسم.
  • بيساعد على تطوير حركته الجسدية، زي: التدحرج و الجلوس ورفع الرأس، لإن عضلات الطفل بتبقى أقوى وأقوى بالتدريج .
  • بيمنع حدوث متلازمة “الرأس المسطح” في المنطقة الخلفية من رأس الطفل، وبيحمي الطفل من تصلب عضلات الرقبة.

إيه هي الخطوات السليمة لنوم الطفل على بطنه؟ ازاي نعوّد أطفالنا على نوم البطن بالتدريج؟

مش متأكدين إيه هي الطريقة السليمة اللي ممكن الطفل يستفيد بيها من النوم على البطن؟

دي بعض النصايح والخطوات اللي هتسهّل روتين نوم البطن مع الوقت:

  • ممكن نبتدى بإننا ننيم الطفل على صدر أو بطن الأم أو الأب وإحنا نايمين على ظهرنا. ممكن كمان نخليه ينام على بطنه على حجرنا. دي بداية كويسة نقدر نعوده بيها على “التامي تايم”.
  • نحول الوقت ده لروتين يومي للطفل. ممكن نخليه تمرين مستمر لفترة قصيرة بعد كل تغيير للحفاضة مثلا، أو وقت التجفيف بالفوطة للطفل بعد الاستحمام، أو أثناء وضع المرطب.
  • ممكن الطفل مايبقاش مرتاح في المرة الأولى. ده طبيعي جداً لإنه ماعندوش القوة اللي تخليه يستحمل يثبت على الوضع ده لمدة طويلة. لازم نفضل نحاول مرة تاية وتالتة لحد ما يتعودوا ويستريحوا. مع الوقت الموضوع هايبقى آسهل بكتير ليكوا انتو الاتنين لما الطفل عضلاته تقوى.

إزاي نخلي وقت النوم على البطن مسلي للأم و الطفل؟

  • مش لازم فقرة النوم على البطن تبقى مملة للطفل. دي بعض الحاجات اللي ممكن نعملها عشان نخليه وقت ممتع أكتر:
  •  القراءة: مهم جداً إننا نحكي للأطفال قصص وده أنسب وقت لكده.
  • ممكن نحفزه إنه يوصل لجسم معين زي لعبة مثلاً أو دبدوب.
  • خلي حد تاني من العيلة يشارك. ممكن تغنوا أو تتكلموا مع الطفل حتى بس تقعدوا معاه، كل ده هايشجعه أكتر إنه يحرك عضلات جسمه.
  • ممكن كمان نحط مراية بلاستيك قدام الطفل عشان نشجعه يرفع رأسه.

ممكن نسند الطفل كمان عن طريق إننا نحطله فوطة رفيعة ملفوفة أو ملاية تحت صدره. بعدها نفرد دراعه فوق الفوطة قدامه. وأخيراً نتأكد إن دقن الطفل تبقى قدام الفوطة عشان نتجنب أي انسداد في مجرى الهواء. و بنأكد تاني إن لازم الطفل يبقى تحت عنينا دايماً خلال فقرة النوم علي البطن عشان نحميه من أي خطر ممكن يحصل.