مكتئب و لا بيخرّف؟ ٧ طرق لمساعدة جدك أو جدتك في الاكتئاب

ازاي أعرف لو جدي أو جدتي بيعانوا من الاكتئاب؟ اكتئاب كبار السن سهل التعامل معاه

كتير بنفتكر إن اكتئاب كبار السن بييجي بشكل طبيعي مع تقدم السن. وبنفتكر إنه نتيجة حتمية لكل التغيرات اللي أهالينا وجدودنا بيمروا بيها وهما بيكبروا. بس هل ده فعلاً السبب الحقيقي وراء اكتئابهم؟ وإيه هي الحاجات اللي نقدر نعملها عشان نساعد الناس اللي بنحبهم؟

اكتئاب كبار السن مش جزء من الشيخوخة

Depression dementia forgetting symptoms old grandparents elderly TABIBI Cairo أعراص اكتئاب كبار السن أو الخرف و النسيان

الاكتئاب حالة مرضية مش مرتبطة بشكل طبيعي مع تقدم السن. في أبحاث كتير بتأكد إن كبار السن بيبقوا سعداء بحياتهم برغم المشاكل اللي بيواجهوها زي الأمراض مثلاً. كبار السن بيمروا بظروف صعبة كتير ممكن تأثر عليهم نفسياً زي المرض، فقدان إنسان عزيز، والطلوع على المعاش أو التقاعد. بس برغم كل ده، التغييرات دي مش شرط تؤدي للاكتئاب. الاكتئاب حاجة مختلفة تماماً عن الحزن أو الإحباط. الإكتئاب بيبدأ لما الشخص بيفشل في إنه يتعامل مع التغييرات اللي بتحصل في حياته وبالتالي بيفقد التوازن العاطفي.

أعراض تساعدك على تمييز الاكتئاب

دي بعض العلامات اللي ممكن ندور عليها لو شاكين إن في حد بنحبه بيعاني من الاكتئاب:

  • – آلام غير مبررة: الاكتئاب ممكن يزود أي آلام عضوية ممكن يكونوا بالفعل بيعانوا منها.
  • – عدم الاهتمام بالنشاطات الاجتماعية والهوايات: ممكن يبدأوا يفوتوا خروجات كنتوا متعودين تكرروها بشكل دوري.
  • – انعدام الثقة بالنفس: بيبدأوا يهملوا مظهرهم أو يبينوا علامات تدل على عدم رغبتهم في الاهتمام بنفسهم. جدتك ممكن مثلاً تبطل تحط مكياج، وجدك ممكن يبطل يحط العطر المفضل بالنسباله.
  • – مزاج متقلب: بيتعصبوا من أقل حاجة ومابيتعاملوش على طبيعتهم.
  • – اضطرابات في النوم: كبار السن اللي بيعانوا من الأرق بيبقى عندهم إحتمال أكبر إنهم يجيلهم اكتئاب.
  • – فقدان الوزن أو الشهية: ممكن يبدأوا ياكلوا أكتر أو أقل من العادي.
  • – عدم القدرة على التركيز: صعوبة في التركيز على مهام معينة، وضعف الذاكرة وصعوبة اتخاذ القرار.
  • – بطئ في الحركة وردود الأفعال.

بعكس التوقعات، كبار السن اللي بيعانوا من الاكتئاب مش بيشتكوا من “الحزن”. في المقابل، بيركزوا أكتر على آلامهم العضوية أو يشتكوا من إنهم معندهمش طاقة. بس لازم بردو نخلي بالنا من الأعراض اللي الناس اللي بنحبهم بيحاولوا يوصلوهالنا من غير ما نفترض حاجات من دماغنا.

ازاي أفرّق بين الاكتئاب و النسيان أو خرف تقدم السن؟

كتير مننا مش بيقدروا يميزوا بين أعراض الاكتئاب وأعراض الخرف عند كبار السن. وفعلاً الاكتئاب والخرف كتير بييجوا مع بعض لإن ٢٠٪-٣٠٪ من الناس اللي بيعانوا من الخرف عندهم اكتئاب. بس ده ما يمنعش إنهم حالتين مختلفتين تماماً وعلاجهم هايبقى مختلف تماماً، وتشخيصهم بشكل خاطئ ممكن يأثر بشكل سلبي على حالة المريض. واللي بيزيد الأمر سوءاً هو إن الناس اللي بتعاني من الخرف بيبقوا بالفعل عندهم صعوبة في التعبير عن أعراض الاكتئاب اللي عندهم بسبب مرضهم. دي بعض العناصر اللي ممكن تساعدنا نفرق بين الخرف والاكتئاب:

  • – الذاكرة: مرضى الاكتئاب بيعانوا من مشاكل في التركيز وبيبقى عندهم صعوبة إنه يفتكروا بعض الأحداث. مرضى الخرف ممكن مايفتكروش الأحداث أصلاً وبيبقى عندهم صعوبة إنهم يفتكروا الحاجات الجديدة اللي بتحصلهم.
  • – الوعي: مرضى الاكتئاب بيبقوا عارفين بالضبط هم بيكلموا مين وبيبقى عندهم إدراك بالوقت واليوم. على عكس مرضى الخرف، اللي بيقى عندهم مشاكل في الوعي والإدراك.
  • – اللغة: مرضى الاكتئاب ممكن يتكلموا ببطئ أحياناً، بس معاندهمش مشكلة مع استخدام اللغة. مرضى الخرف بيبقى عندهم صعوبة يفتكروا أسماء الأشياء العادية.
  • – استخدام الأدوات اليومية: مرضى الخرف مش ممكن مايعرفوش يتصرفوا بشكل طبيعي، يعني ممكن مايعرفوش يلبسوا جاكيت مثلاً. مرضى الاكتئاب مش بيواجهوا المشكلة دي.

إيه اللي ممكن نعمله عشان نساعد حد بنحبه عنده اكتئاب؟

دي بعض الحاجات اللي ممكن نعملها عشان نساعد أهلنا أو جدودنا اللي بيعانوا من الاكتئاب:

  • نسمعهم: دايماً بنفتكر إننا لازم ننصح الناس اللي نحبهم أو نديهم اقتراحات تطلعهم من اللي هم فيه. بس في الحقيقة، إحنا مش محتاجين نقولهم أي حاجة. معظم الوقت كل اللي بيبقوا محتاجينه مننا هو حضن أو أي لفتة بسيطة نعبرلهم بيها عن حبنا وإننا هانفضل دايماً جنبهم.
  • نقضي وقت فراغنا معاهم: إننا نشاركهم أنشطة خفيفة زي لعب الكوتشينة أو الكلمات المتقاطعة أو البازل ممكن ترفه عنهم كتير وتخرجهم من المود اللي هم فيه. ممكن كمان نقلب معاهم في الصور القديمة ونسمعهم وهم بيحكوا القصص اللي ورا الصور دي.
  • الرياضة: التمرين والرياضة حاجات بتعدل المزاج وبتغير المود تماماً. فياريت نتمشى معاهم بشكل يومي أو نحضر معاهم درس يوجا مثلاً، هتفرق معاهم جداً.
  • منسيطرش على حياتهم: ممكن نفتكر إن لما نساعدهم ونعملهم كل طلباتهم بنساعدهم. لكن بالعكس، ده ممكن يزود الاكتئاب عندهم لإنهم هايحسوا بالعجز وإنهم عبئ على اللي حواليهم. في المقابل، ممكن نشيلهم مسؤوليات هادفة زي إنهم يربوا حيوان أو يزرعوا نباتات في البيت.
  • الأكل: نتأكد إنهم بياكلوا كويس، يعني ياكلوا حاجات غنية بالألياف (زي الموز والبقوليات والعيش بالحبوب الكاملة)، وبروتينات الخالية من الدهون. وطبعاً نقلل من السكر والنشويات والدهون الغير صحية. كل المأكولات الغنية بالأوميجا ٣ (زي العين جمل، والسلمون، ويذور الكتان) بردو بتبقى مفيدة جداً.
  • الدعم المستمر: وجود حياة عائلية واجتماعية نشطة بيساعدهم جداً إنهم مايحسوش بالوحدة أو العزلة. لو هم بيحبوا القراية خليهم يشتركوا في نادي للقراية. ناخدهم حفلات على ذوقهم، ونساعدهم يتصلوا بأصحابهم القدام.
  • منفرضش عليهم المرض: لو هم بيقاوموا فكرة إنهم تعبانين أو مرضى ياريت منستخدمش ألفاظ تقيلة عليهم زي “اكتئاب”، “مشكلة”، أو “علاج”. في المقابل ممكن نستخدم كلمات أخف شوية زي “حزن”، “وقت عصيب”، أو “مساعدة” عشان نسهل عليهم وعلى نفسنا النقاش في الموضوع.