طبيبى ۲٤/٧

ازاي تضمني صحة وفرحة أولادك في العيد؟

حاجات تاخدي بالك منها في العيد:

قبل ما تدي طفلك كحكة تانية، خلي بالك إنها بتضر صحته. الكحك وكل حلويات العيد التانية مليانين بالزيوت والسكريات والدهون ودة ممكن يجيبلهم عُسر الهضم وكمان بيرفع وزنهم ومشاكل تانية لصحتهم. عشان كدة فيه 3 نصايح لازم تاخدي بالك منها:

1. الكحك مش مناسب للأطفال الأقل من سنتين لإنه ممكن يسببلهم إسهال.
2. الأطفال مش بيقدروا يتحكموا في شهيتهم فمتخليش قدامهم أي حلويات وحطيها في أماكن ميقدروش يوصلوا ليها لوحدهم.
3. الأطفال ما بين 6 ل 12 سنة محتاجين 1600-2200 سُعر حراري في اليوم. والكحكة الواحدة فيها 200 سُعر حراري والُغريّبة 160 سُعر حراري والبيتي فور 90 سُعر حراري والبسكوت 60 سُعر حراري.

ازاي تخلي العيد فرحة من غير تعب الأولاد؟

بعد ما عرفتي إنك مينفعش تخلي طفلك ياكل كل الكمية اللي حاببها من كحك العيد، أكيد بتفكري ازاي تخلي طفلك يحس بفرحة العيد؟ أكيد في طرق تانية أطفالنا يقدروا يستمتعوا بوقتهم في العيد.

1- متشتريش كحك السنادي واعملي كحك بيتي

أغلبنا بيشتري كحك جاهز من برة عشان بيخافوا من الفوضى في المطبخ وبينسوا إنها فرصة كويسة عشان يقضوا وقت ممتع مع أطفالهم في العيد.

فرد العجينة والضغط عليها بالأصابع أو دقها بكف الايد بيقوي عضلات طفلك اللي هيستخدمها بعد كدة في مسكة القلم أو التحكم في المقص وغيرها من الحاجات اللي بتحتاج مسكة ايد قوية. كمان بتخليه يعرف ينسق بين حركة جسمه وعينه وبتقوي من المهارات الحركية الدقيقة اللي بيستخدمها في حركه صوابعه وفي نفس الوقت هو بيكون مبسوط وهو بيشكل وبيلعب بالعجينة.

كمان ممكن تعلميه أسامي الحاجات اللي بيستخدمها في المطبخ أو كلمات توصف ملمس كل حاجة وأشكالها المختلفة أو حتى تعرفيه شوية حساب وكيميا وانتي بتعدي أو بتجربي معاه خلط المقادير أو حتى تقوي خياله بإنك تشجعيه يفكر العجينة هيبقى شكلها ازاي بعد ما تدخل الفرن؟

2- احكي مع العيدية حدوتة يتعلم منها

كل الأطفال بيجيلهم عيديات في العيد، وكلهم بيحبوها عشان بيحبوا الهدايا اللي بتجيلهم من قرايبهم. بس ليه متغيريش الروتين وتعلميهم حاجة مفيدة زي ازاي يصرف الفلوس صح وايه فايدة إنه يبتدي يحوش؟

هاتي 3 علب واكتبي على كل واحدة:"اللي حوشته" "اللي هصرفه" و "اللي هساعد بيه غيري". وقسمي مع طفلك الفلوس عليهم. بعد كدة الفلوس بتاعته هاتي بيها حاجات تفرحه زي حاجات حلوة أو استيكرز اَ ألعاب تنمي مهاراته زي تراك للسيارات يبنيه او قطع ال LEGO المناسبة لسنه. والفلوس اللي اتفقتوا سوا إنها لمساعدة الناس التانية اديها للي محتاجها. ولو هو طلب منك هدايا غالية زي اللعب ممكن تجيبي من الفلوس اللي حوشها. بس خليه يختار حاجة متكونش غالية أوي عشان يقدر يشتريها بفلوسه في خلال كام شهر عشان تحسسيه إنه عمل حاجة مهمة.

الأهالي لازم يحاولوا يدوا فلوس لأطفالهم بس بعد ما يعملوا حاجة في المقابل عشان يحسوا إنهم استحقوها ويحسوا بقيمتها. ممكن تديله مصروف أو تكافأي طفلك بملغ بعد حاجات بسيطة طلبتي منه إنه يعملها أو بعد ما يعمل حاجة كويسة لوحده. وممكن تشجعيه أكتر بإنك تساعدي معاه أو إنك تديله قد اللي قدر يحوشهم.

كمان تقدري تخلي ولادك يحبوا الحساب ويعرفوا يخططوا أحسن بإنك تخليهم يحسبوا حوشوا كام وقد ايه فلوس محتاجين يجمعوها وقعدوا اد ايه وقت عشان يوصلوا للمبلغ كله.

3- احمي أطفالك من الألعاب النارية في العيد

الأطفال بيحبوا يشوفوا الألعاب النارية بس دة ميقللش من خطورتها وإنها نار حقيقية مؤذية للأطفال. "اللعب بالنار" ممكن يسبب حروق أو إصابات في العين للكبار و الصغيرين. أحسن حاجة هي إننا نتفرج على الألعاب النارية من بعيد ونخلي التعامل معاها للمحترفين بس.

بس لو طفلك أصر إنه يجربها، فيه تحذيرات لازم تاخدي بالك منها:

1. ممنوع تمامًا استخدامها في البيت.
2. خلي مسافة بينك وبينها بعد ما تشعليها حسب الإرشادات.
3. متتخلصيش منها من غير ما تتأكدي من إنها اتطفت تمامًا بإنك تحطيها تحت المية.
4. خلي بالك إن مش كل الألعاب النارية ينفع تشتريها عشان في منها مُخصص للمحترفين بس، وكمان لازم تستخدميها في الأماكن المُرخص ليها فقط.
5. لو فيه واحدة مشتغلتش تخلصي منها فورًا من غير ما تحاولي تشعليها تاني.

لما تحطي شوية حدود لإحتفالات ابنك بالعيد مش معناه إنك بتحرميه من الفرحة؛ بالعكس إنتي بكدة هتخليه يستمتع بالعيد وفي نفس الوقت تكوني مطمنة على سلامته.

دكاترة أطفال طبيبي موجودين 24 ساعة في كل الأيام والاجازات في القاهرة الكبرى طوال العيد والصيف سهرانين على راحة أسرتك. للحجز 16724.